“Bir” ekosisteminin Baş icraçı direktoru Fərid Hüseynov bildirib ki, ekosistemin əsas məqsədi texnologiyanı insanların gündəlik həyatına daha yaxın və faydalı etməkdir.

GDP Media xəbər verir ki, onun sözlərinə görə, bu yanaşma çərçivəsində artıq İçərişəhərdə yeni rəqəmsal transformasiya layihəsinə start verilib.

Baş icraçı direktor qeyd edib ki, İçərişəhər Dövlət Tarix-Memarlıq Qoruğu İdarəsi ilə qurulan tərəfdaşlıq yalnız rəqəmsal layihə deyil, həm də qədim mədəni irslə müasir texnologiyalar arasında yaradılan innovativ körpüdür.

Fərid Hüseynov vurğulayıb ki, layihənin əsas məqsədi İçərişəhərin unikal atmosferini qorumaqla yanaşı, rəqəmsal həllər və süni intellekt texnologiyalarından istifadə etməklə sakinlər, yerli sahibkarlar və turistlər üçün daha rahat və çevik şəhər təcrübəsi formalaşdırmaqdır.

Onun sözlərinə görə, təşəbbüs çərçivəsində tarixi irsin qorunması prioritet olaraq saxlanılacaq və eyni zamanda bu dəyərlərin daha geniş auditoriya üçün əlçatanlığı artırılacaq.