Bazar ertəsi günü qlobal maliyyə bazarlarında müxtəlif istiqamətli hərəkət müşahidə olunub. Neft qiymətləri kəskin eniş edərkən, ABŞ fond indeksləri ticarətin əvvəlində yüksəliş qeydə alıb.
GDP Media xəbər verir ki, cümə günü dövlət bayramı ilə əlaqədar bağlı olan ABŞ birjaları bazar ertəsi yüksəlişlə açılıb. Treyderlər Yaxın Şərqdəki geosiyasi vəziyyəti və neft bazarındakı dəyişiklikləri qiymətləndirməyə davam edirlər.
Bakı vaxtı ilə saat 16:56-ya olan məlumata görə:
- Dow Jones indeksi 0,54% qalxaraq 51.844,37 bəndə çatıb. Ən çox artımı Caterpillar (+1,9%), Amgen (+1,5%) və Visa Inc. (+1,5%) göstərib.
- S&P 500 göstəricisi 0,32% artaraq 7.524,24 bənd olub. İndeksin liderləri Super Micro Computer (+15,4%), ON Semiconductor (+7,1%) və Coinbase Global (+6,1%) olub.
- Nasdaq indeksi isə 0,02% əlavə edərək 26.523,01 bənd səviyyəsində qərarlaşıb.
Beləliklə, enerji daşıyıcılarının ucuzlaşması fonunda ABŞ səhm bazarında investorların risk iştahası qorunub saxlanılır. Növbəti günlərdə həm neft hasilatına dair statistikalar, həm də Yaxın Şərqdəki danışıqlar prosesi bazarlara istiqamət verəcək əsas amillər olaraq qalır.
