Bank of America (BofA) analitikləri ABŞ fond bazarında korreksiya risklərinin artdığını bildirərək investorlara mövqelərini yenidən qiymətləndirməyi tövsiyə ediblər.

“GDP Media” xəbər verir ki, analitiklərin fikrincə, bazarda bir sıra “qırmızı bayraqların” toplanması müşahidə olunur. İnvestor əhval-ruhiyyəsini əks etdirən göstəricilər və texniki siqnallar bazarın həddindən artıq qızışdığını göstərir. Eyni zamanda, şirkətlərin gələcək maliyyə nəticələri ilə bağlı proqnozlarının zəifləməsi, bazarın bir neçə iri texnologiya şirkətində yüksək konsentrasiyası və ABŞ Federal Ehtiyat Sisteminin (FED) gələcək pul-kredit siyasəti ilə bağlı qeyri-müəyyənlik əsas risk amilləri kimi qeyd olunur.

BofA hesab edir ki, ilin əvvəlindən etibarən ABŞ səhmlərinə yatırım edən investorlar üçün mövcud qiymət səviyyələri mənfəətin qismən realizə edilməsi baxımından əlverişli mərhələdir.

Bununla belə, bank bazardan tam çıxışı tövsiyə etmir. Analitiklər portfel strukturunun yenidən nəzərdən keçirilməsini, vəsaitin bir hissəsinin nağd vəsaitdə və ya müdafiə xarakterli sektorlarda yerləşdirilməsini məqsədəuyğun hesab edirlər. Onların fikrincə, bu yanaşma mümkün bazar korreksiyası zamanı portfelin volatilliyini azaltmağa və risklərin idarə olunmasına kömək edə bilər.