Beş aparıcı maliyyə qurumu qlobal iqtisadiyyat və maliyyə bazarları ilə bağlı yeni proqnozlarını açıqlayıb.

GDP Media xəbər verir ki, Goldman Sachs süni intellekt sahəsində rəqabətin miqyasını qiymətləndirərək texnologiya nəhənglərinin AI layihələrinə xərclərinin 2027-ci ilə qədər 1,1 trilyon ABŞ dollarına çata biləcəyini bildirib. Bankın hesablamalarına görə, hesablama gücünə olan tələbat 2030-cu ilə qədər 24 dəfə arta bilər.

World Bank isə geosiyasi gərginlik və yüksək enerji qiymətlərini əsas gətirərək 2026-cı il üzrə qlobal iqtisadi artım proqnozunu 2,5 faizə endirib.

Bank of America ABŞ fond bazarında risklərin artdığını vurğulayaraq səhmlər üzrə 10 əsas ayı indikatorundan 7-sinin aktiv olduğunu qeyd edib. Bank S&P 500 indeksi üzrə hədəf göstəricisini 7 100 bənd səviyyəsində saxlayır ki, bu da mövcud səviyyələrdən təxminən 4,5 faiz aşağıdır.

Morgan Stanley Asiya mayeləşdirilmiş təbii qaz (LNG) bazarında qiymətlərin forvard əyrisindən 30 faiz yüksək ola biləcəyini proqnozlaşdırır.

Citigroup isə ABŞ dollarının möhkəmlənməsi fonunda qızılın üç aylıq qiymət proqnozunu bir unsiya üçün 4 300 dollardan 4 000 dollara endirib.

Analitiklərin fikrincə, ABŞ səhmləri üzrə ayı siqnallarının sayının artması əvvəlki bazar zirvələri dövründə müşahidə olunan göstəricilərə yaxınlaşır. Bu səbəbdən bazar iştirakçıları mümkün korreksiyanın baş verib-verməyəcəyindən daha çox, onun hansı amillə tetiklənəcəyinə diqqət yetirirlər.