Yaxın Şərqdə İran və İsrail arasında hərbi gərginliyin yenidən artması dünya enerji bazarlarında neft qiymətlərinin kəskin bahalaşmasına səbəb olub.
“GDP Media” xəbər verir ki, iyunun 8-də Londonun ICE Futures birjasında Brent markalı neftin avqust fyuçerslərinin qiyməti ticarət zamanı bir barel üçün 97,85 ABŞ dollarına çatıb. Bu göstərici əvvəlki ticarət sessiyasının bağlanış qiyməti ilə müqayisədə 5,1% yüksəkdir. Sonradan qiymət artımı nisbətən zəifləyərək 97,31 ABŞ dolları səviyyəsində qərarlaşıb.
Neft bazarında yüksəliş İran və İsrail arasında raket zərbələrinin mübadiləsindən sonra baş verib. Mütəxəssislər hesab edirlər ki, bu hadisələr Yaxın Şərqdə atəşkəs perspektivlərini zəiflədərək regionda enerji təchizatı ilə bağlı riskləri artırıb.
Bununla yanaşı, Hörmüz boğazında davam edən məhdudiyyətlər Fars körfəzindən dünya bazarlarına enerji daşıyıcılarının daşınmasına mənfi təsir göstərir. Təkliflə bağlı narahatlıqların artması isə neft qiymətlərinə əlavə dəstək verir.
Digər tərəfdən, OPEC+ iyul ayı üçün neft hasilatı kvotalarını gündəlik 188 min barel artırmaq qərarını təsdiqləyib. Lakin analitiklər hesab edirlər ki, Yaxın Şərqdəki geosiyasi risklər hazırda bazarda əsas qiymət formalaşdıran amil olaraq qalır.
ABŞ Prezidenti Donald Tramp isə Vaşinqton və Tehran arasında danışıqların davam etdiyini bəyan edib. O, həmçinin danışıqların nəticəsiz qalacağı təqdirdə ABŞ-ın daha sərt addımlar ata biləcəyini bildirib.
