Lloyd Blankfein bildirib ki,ABŞ borclarını dolların dəyərsizləşməsi hesabına qaytara bilər
“GDP Media” xəbər verir ki, ABŞ-ın “Goldman Sachs” investisiya bankının keçmiş rəhbəri Lloyd Blankfein dolların gələcək dəyəri və dövlət borcları ilə bağlı diqqətçəkən açıqlamalar verib.
O bildirib ki, ABŞ hazırda maliyyələşmə baxımından ciddi çətinlik yaşamır, çünki dollar dünyanın əsas ehtiyat valyutası hesab olunur. Bununla belə, investorları narahat edən əsas məsələ gələcəkdə qaytarılacaq vəsaitin real dəyərinin necə dəyişəcəyidir.
Blankfeinin sözlərinə görə, ABŞ dollarla borclanır və eyni zamanda dollar çap etmək imkanına malikdir. Bu səbəbdən ölkənin texniki baxımdan borc öhdəliklərini yerinə yetirə bilməməsi ehtimalı aşağıdır. Lakin o vurğulayıb ki, əsas risk illər sonra həmin borcların daha zəif alıcılıq qabiliyyətinə malik dollarla qaytarılmasıdır.
Keçmiş bank rəhbəri qeyd edib ki, dövlətlər öz milli valyutalarında borclandıqları zaman borc yükünün azalması birbaşa ödənişin dayandırılması ilə deyil, valyutanın zamanla dəyər itirməsi hesabına baş verə bilər.
Analitiklər hesab edirlər ki, yüksək inflyasiya və pul kütləsinin artması investorların qızıl və digər qoruyucu aktivlərə marağını artıran əsas amillərdən biri olaraq qalır.
