ASSIST Finance ABB səhmləri üzrə marketmeyker olacaq.
“GDP Media” xəbər verir ki, 09 iyun 2026-cı il tarixində Baku Stock Exchange (BSE) ilə ASSIST Finance arasında marketmeyker fəaliyyəti üzrə müqavilə imzalanıb.
Müqaviləyə əsasən, ASSIST Finance təkrar bazarda ölkənin ən böyük bankı olan Azərbaycan Beynəlxalq Bankı (ABB) ASC-nin adi, adlı və sənədsiz səhmləri üzrə bazar tənzimləyicisi (marketmeyker) funksiyasını həyata keçirəcək. Şirkət gündəlik olaraq 15%-lik qiymət dəhlizi çərçivəsində alış və satış qiymətlərini müəyyən edəcək, eyni zamanda birjanın ticarət sistemində hər gün ən azı 50 min manat ekvivalentində aktiv alış və satış sifarişləri yerləşdirəcək.
ASSIST Finance bildirir ki, bu əməkdaşlıq ABB səhmlərinin təkrar bazarda likvidliyinin artırılmasına, investorlar üçün daha sabit, təhlükəsiz və aktiv ticarət mühitinin formalaşdırılmasına xidmət edəcək. Şirkətin qiymətləndirməsinə görə, marketmeyker institutunun gücləndirilməsi kapital bazarlarının inkişafına, qiymətlərin daha effektiv formalaşmasına və investorların bazara çıxış imkanlarının genişlənməsinə müsbət təsir göstərəcək.
ASSIST Finance həmçinin vurğulayıb ki, şirkət bundan sonra da kapital bazarlarının inkişafı və investorların etimadının möhkəmləndirilməsi istiqamətində fəaliyyətini davam etdirəcək.
