Cənubi Qafqazın aparıcı banklarından olan ABB-nin “AI-nur” və “AI-xan” süni intellekt köməkçiləri dünyanın nüfuzlu maliyyə platformalarından biri olan Yahoo Finance-da geniş şəkildə işıqlandırılıb.

Bildirilib ki, bu, Azərbaycan və region bankçılıq sektorunda səsli süni intellekt həllərindən istifadə edən ilk nümunələrdən biridir.

Xidmətə qoşulduğu gündən etibarən süni intellekt köməkçiləri böyük maraqla qarşılanıb. Artıq 230 minədək istifadəçi bu xidmətdən yararlanıb, 2,5 milyondan çox qarşılıqlı əlaqə qeydə alınıb.

AI-nur və AI-xan müştərilərə təbii səs əmrləri ilə bank əməliyyatlarını aparmağa imkan verir. İstifadəçilər öz kartları və hesabları arasında pul köçürə, mobil nömrə vasitəsilə başqalarına vəsait göndərə bilərlər. Sadəcə alıcının adını söyləmək kifayətdir – sistem kontaktı tanıyır və əməliyyatı həyata keçirir. Bundan əlavə, köməkçilər kartın bloklanması və ya yenidən aktivləşdirilməsi kimi təhlükəsizlik funksiyalarını da yerinə yetirir.

Bankın məlumatına görə, hazırda müxtəlif istiqamətlərdə tətbiq olunan generativ və proqnozlaşdırıcı modellərin sayı 180-ə çatıb. Bu modellər banka 35 milyon AZN-dən çox müsbət maliyyə təsiri gətirib.

Təhlükəsizlik əsas prioritet olaraq qalır. Bütün əməliyyatlar ABB Bank-ın təhlükəsiz rəqəmsal infrastrukturu vasitəsilə həyata keçirilir və ən yüksək bankçılıq və kibertəhlükəsizlik standartlarına cavab verir.

ABB Bank yaxın gələcəkdə AI-nur və AI-xan-ın imkanlarını genişləndirməyi və daha çox bank xidmətlərini süni intellekt vasitəsilə təqdim etməyi planlaşdırır.