Dövlət Statistika Komitəsinin açıqladığı makroiqtisadi göstəricilərə əsasən, Azərbaycan iqtisadiyyatı 2026-cı ilin yanvar-aprel aylarında 2025-ci ilin eyni dövrü ilə müqayisədə 0,2% artım göstərib.
GDP Media xəbər verir ki, hesabat dövründə ölkədə 39 milyard 875,1 milyon manatlıq ümumi daxili məhsul istehsal edilib.
Qeyd edək ki, 2026-cı ilin yanvar-mart aylarında iqtisadiyyat 0,3% kiçilmişdi. Beləliklə, aprel ayında artım cüzi də olsa yenidən müsbət həddə qayıdıb.
Mayın 2-də Qubada “Regional biznesin inkişafı və rəqəmsallaşma” Sammiti baş tutacaq. GDP Media xəbər verir ki, tədbirin əsas məqsədi ölkənin şimal-şərq regionunun iqtisadi potensialının artırılması, yerli sahibkarların dəstəklənməsi və rəqəmsal transformasiyanın təşviq edilməsidir. Sammit MÜSİAD Azerbaijan, TECHERA və “Quba Sahibkarlarına Dəstək” platformasının (QİAD) birgə təşkilatçılığı, Kiçik və Orta Biznesin İnkişafı Agentliyinin (KOBİA), Azərbaycan Sahibkarlar Konfederasiyasının, Azərbaycan Fintech Assosiasiyasının və ADPU-nun Quba filialının rəsmi tərəfdaşlığı ilə reallaşacaq. Tədbir çərçivəsində “Regional Expo” sərgisi və B2B görüşləri təşkil olunacaq. Bu platformalar vasitəsilə 100-dən çox müəssisə arasında tərəfdaşlıq əlaqələrinin qurulmasına şərait yaradılacaq. Sammitin xüsusi bölməsi olan “Texnologiya və rəqəmsal zona”da iştirakçılara İT həlləri, elektron ticarət layihələri və istehsalın avtomatlaşdırılması alətləri nümayiş etdiriləcək. Maliyyə resurslarına əlçatanlığı artırmaq məqsədilə sahibkarlara güzəştli kreditləşmə və mikrobiznesin dəstəklənməsi proqramları barədə geniş məlumat veriləcək. Bundan əlavə, sammitin proqramına gənc mütəxəssislər və sahibkarlar üçün xüsusi mentor sessiyaları daxil edilib. Həmin sessiyalarda təcrübəli mütəxəssislər tərəfindən praktiki biliklərin ötürülməsi nəzərdə tutulur. Tədbirdə iştirak etmək istəyənlər aşağıdakı link vasitəsilə qeydiyyatdan keçə bilərlər:https://shorturl.at/19YCl
Neft İxrac Edən Ölkələr Təşkilatı (OPEC) bu ilin aprel ayında Azərbaycanda orta gündəlik xam neft hasilatının 460 min barel təşkil etdiyini açıqlayıb. GDP Media OPEC-in aylıq hesabatına istinadən verdiyi məlumata görə, bu rəqəm mart ayı ilə müqayisədə 3 min barel çoxdur. Belə ki, mart ayında sutkalıq neft hasilatı 457 min barel olub. Hesabatda həmçinin qeyd edilib ki, ölkədə gündəlik ortalama neft hasilatı bu ilin birinci rübündə 454 min barel səviyyəsində qeydə alınıb. 2025-ci ildə isə Azərbaycanda gündəlik neft hasilatı orta hesabla 461 min barel təşkil edib.
