Gürcüstanda qanunsuz kriptovalyuta mayninqinə qarşı genişmiqyaslı mübarizəyə start verilib. Xüsusilə, əhaliyə elektrik enerjisinin pulsuz təqdim olunduğu dağlıq Svanetiya bölgəsində nəzarət tədbirləri gücləndirilib.

“GDP Media” xəbər verir ki, bu barədə hüquq-mühafizə orqanlarının fəaliyyətinin koordinasiyası üzrə dövlət naziri Mamuka Mdinaradze açıqlama verib.

Nazirin sözlərinə görə, bölgədə elektrik enerjisinin həddindən artıq istehlakı həm yerli əhali, həm də dövlət üçün ciddi problemlər yaradır.

O bildirib ki, Svanetiyada enerji istehlakı əhalisinin sayına görə oxşar digər regionlarla müqayisədə on dəfələrlə yüksəkdir.

Mamuka Mdinaradze qeyd edib ki, qanunsuz mayninq fəaliyyəti səbəbindən dövlət hər il minimum 20-25 milyon lari, yəni təxminən 9,5 milyon dollar həcmində zərərə məruz qalır.

Gürcüstan hakimiyyəti qanunsuz enerji istifadəsinin qarşısının alınması və elektrik şəbəkəsinə düşən yükün azaldılması məqsədilə regionda yoxlamaları davam etdirəcəyini bildirib.