Cloudflare Radarın hesabatına görə, qlobal internet trafikinin 57,4%-i botlar və süni intellekt (Sİ) agentləri tərəfindən yaradılır. İnsanların payı isə cəmi 42,6% təşkil edir.
“GDP Media” xəbər verir ki, hesabat mayın 29-dan iyunun 4-dək olan həftəni əhatə edir. Bu dövrdə HTML-məzmununa edilən bütün HTTP sorğularının əksəriyyəti avtomatlaşdırılmış sistemlərin payına düşüb. Xüsusilə, süni intellekt agentləri – ya təlim modelləri üçün məlumat toplayan, ya da istifadəçi adından fəaliyyət göstərən sistemlər – sorğuların əhəmiyyətli hissəsini təşkil edir.
Cloudflare şirkətinin baş direktoru Metyu Prins etiraf edib ki, bu dəyişiklik onun gözlədiyindən daha tez baş verib. “Mən bunun yalnız 2027-ci ildə reallaşacağını düşünürdüm,” – deyə Prins bildirib.
Mütəxəssislər bu tendensiyanı “ölü internet” nəzəriyyəsi ilə əlaqələndirirlər. Həmin nəzəriyyəyə görə, ictimai şəbəkə getdikcə simulyasiyaya çevrilir – məzmunun və qarşılıqlı əlaqələrin böyük hissəsi süni intellekt tərəfindən yaradılır, canlı istifadəçilər isə aktivliyin yalnız kiçik bir hissəsini təşkil edir.
