Dünya yaxın gələcəkdə neftə tələbatın pik həddinə çatmasının şahidi olmayacaq. Bunu OPEC-in baş katibi Haysam əl-Qays bildirib.

“İcazə verin, qəti şəkildə deyim ki, bəzi dairələrin proqnozlaşdırdığı və ya proqnozlaşdırmış olduğu kimi, biz neftə tələbatın pik həddini görmürük. Hətta bir neçə il əvvəl verilmiş belə proqnozlar indi tədricən aktuallığını itirir”, – deyə o qeyd edib.

Baş katib əlavə edib ki, neft 2050-ci ildən sonra da qlobal enerji balansında əsas rol oynamağa davam edəcək.

Onun sözlərinə görə, qlobal iqtisadi artım, əhalinin çoxalması, urbanizasiya prosesləri və inkişaf etməkdə olan ölkələrdə enerji tələbatının artması neft istehlakını dəstəkləməyə davam edəcək. Buna görə də təşkilat yaxın perspektivdə neftə tələbatın maksimum səviyyəyə çatacağını gözləmir.