Neft İxrac Edən Ölkələr Təşkilatı (OPEC) 2026-cı ildə qlobal neft tələbatının artımı ilə bağlı proqnozunu sutkada 200 min barel azaldıb.
GDP Media xəbər verir ki,təşkilatın aylıq hesabatına əsasən, gələn il dünya üzrə neft tələbatının sutkada 0,97 milyon barel artaraq 106,13 milyon barelə çatacağı gözlənilir. Halbuki əvvəlki proqnozda bu göstəricinin 1,17 milyon barel artaraq 106,33 milyon barel olacağı bildirilirdi.
OPEC-in qiymətləndirməsinə görə, 2025-ci ildə qlobal neft tələbatı 105,16 milyon barel/sutka səviyyəsində qalacaq. Bu göstərici əvvəlki hesabatla müqayisədə dəyişməyib. Təşkilat 2027-ci il üzrə proqnozunu isə demək olar ki, sabit saxlayaraq 107,86 milyon barel/sutka səviyyəsində qiymətləndirib.
Hesabatda qeyd olunur ki, qlobal iqtisadi artım templəri və enerji bazarlarında müşahidə olunan dəyişikliklər neftə olan tələbat gözləntilərinə təsir göstərməkdə davam edir.
Bununla yanaşı, OPEC analitikləri 2027-ci ildə qlobal neft tələbatının əvvəlki illə müqayisədə sutkada 1,73 milyon barel artacağını proqnozlaşdırırlar. Bu göstərici əvvəlki proqnozdan 190 min barel yüksəkdir.
Beləliklə, OPEC qısamüddətli perspektivdə neftə tələbatla bağlı gözləntilərini ehtiyatlı şəkildə yenidən nəzərdən keçirsə də, orta müddətli dövrdə qlobal enerji istehlakının artmaqda davam edəcəyini gözləyir.
