Azərbaycan özəl investisiyalar vasitəsilə inkişafı təşviq edir.

“GDP Media” xəbər verir ki, bunu İqtisadiyyat Nazirliyinə məxsus “Azərbaycan Biznesinin İnkişafı Fondu” ASC-nin İdarə Heyətinin sədri Ülvi Mansurov Bakıda keçirilən İslam İnkişaf Bankı (IsDB) Qrupunun 51-ci İllik Toplantısı çərçivəsində təşkil olunmuş “Ərəb Koordinasiya Qrupunun (ACG) Özəl Sektor Sessiyası”nda bildirib.

Onun sözlərinə görə, davamlı inkişafa nail olmaq üçün hökumətlər və maliyyə institutlarının təklikdə səyləri yetərli deyil:

“Bu məqsədə çatmaq üçün hökumətlər və maliyyə institutları, eləcə də suveren investorlar və özəl sektor arasında güclü tərəfdaşlıq tələb olunur. Bu gün özəl sektor inkişafın sadəcə benefisiarı deyil, onun əsas hərəkətverici qüvvəsinə çevrilib. O, yeni iş yerləri yaradır, innovasiyaları təşviq edir, məhsuldarlığı artırır və dayanıqlı iqtisadiyyatların formalaşmasına töhfə verir. Hər bir uğurlu iqtisadiyyat yalnız dövlət investisiyaları üzərində deyil, həm də sahibkarların və bizneslərin ideyalarını real imkanlara çevirmək bacarığı üzərində qurulur.

İnfrastruktur və enerji, ərzaq təhlükəsizliyi, rəqəmsal transformasiya və iqlim dəyişikliklərinə qarşı dayanıqlılıq kimi sahələrdə mövcud imkanların miqyası böyük investisiya tələb edir. Bu bir qurumun təkbaşına təmin edə biləcəyi yük deyil. Azərbaycan bu yanaşmaya tam sadiqdir. Bu gün aparacağımız müzakirələr yalnız layihələr və maliyyələşdirmə mexanizmləri haqqında deyil. Bu müzakirələr sahibkarlıq, innovasiya və özəl investisiyalar vasitəsilə inkişafı irəli aparan tərəfləri bir araya gətirmək məqsədi daşıyır”.