.Transxəzər Beynəlxalq Nəqliyyat Marşrutu (TBNM) sadəcə logistik layihə olmaqdan çıxaraq türk dövlətlərinin əsas geoiqtisadi alətinə çevrilib.
GDP Media xəbər verir ki, Qazaxıstan Türk Dövlətləri Təşkilatı (TDT) çərçivəsində bu marşrutun inkişafını ardıcıl şəkildə dəstəkləyir və onu Asiya ilə Avropa arasında strateji əhəmiyyətli yol kimi dəyərləndirir.Son yeddi ildə Orta Dəhliz üzrə yükdaşımaların həcmi 800 min tondan 4,5 milyon tona – yəni 5 dəfədən çox artıb. 2025-ci ilin yekunlarına əsasən, konteyner daşımaları 36% yüksələrək təxminən 77 min DFE (iyirmi fut ekvivalenti) təşkil edib. Qazaxıstanın hədəfi isə 2029-cu ilədək bu göstəricini 300 min DFE-ə çatdırmaqdır.
Marşrut ənənəvi Şimal dəhlizindən təxminən 2 min km qısa olmaqla sürət və təhlükəsizlik baxımından üstünlük təmin edir. Çindən Avropaya yüklərin çatdırılma müddəti cəmi 15 gün təşkil edir ki, bu da dəmir yolu daşımalarının orta hesabla 7-8 gün azalması deməkdir.
Ekspertlər qeyd edir ki, marşrutun gələcək inkişafı infrastrukturun sistemli modernləşdirilməsi, logistikanın sinxronlaşdırılması və region ölkələri arasında koordinasiyanın gücləndirilməsindən birbaşa asılıdır.
