ABŞ İran neftinə qarşı tətbiq olunan sanksiyaların bir hissəsini danışıqlar müddətində müvəqqəti dayandırmağa hazırlaşır.

GDP Media xəbər verir ki, bu barədə İranın Tasnim agentliyi məlumat yayıb.

Məlumata görə, qərar Vaşinqton və Tehran arasında davam edən danışıqlar fonunda qəbul edilib və əsas məqsəd proses zamanı gərginliyi azaltmaqdır. Müvəqqəti yumşalma İranın neft ixracını artırmasına və ölkəyə əlavə valyuta axınının təmin olunmasına imkan yarada bilər.

Ekspertlər hesab edirlər ki, bu addım qlobal enerji bazarında təklifin artması ilə nəticələnə bilər. Bu isə orta müddətli perspektivdə neft qiymətlərinə təzyiq göstərə bilər. Bununla belə, bazarın əsas diqqəti danışıqların yekun nəticəsinə yönəlib.

Analitiklərin fikrincə, yekun razılaşmanın əldə olunacağı halda İranın dünya bazarına əlavə neft həcmləri çıxarması mümkün olacaq. Əks halda isə hazırkı qərar yalnız müvəqqəti taktiki addım kimi qalacaq.