Google süni intellekt infrastrukturu üçün istifadə etdiyi çiplərin bir hissəsini Samsung-dan satın almağa hazırlaşır.

“GDP Media” xəbər verir ki, bu barədə “The Information” nəşri məlumat yayıb.

Məlumata görə, qərarın əsas səbəbi Nvidia tərəfindən istehsal olunan süni intellekt sürətləndiricilərinin çatışmazlığı və yüksək qiymətləridir. Hazırda Nvidia bazarda lider mövqedə olsa da, artan tələbat texnologiya şirkətlərini alternativ təchizatçılar axtarmağa sövq edir.

Ekspertlərin fikrincə, Google-un Samsung ilə əməkdaşlığı şirkətin təchizat zəncirini şaxələndirməsinə və bir istehsalçıdan asılılığını azaltmasına imkan verəcək.

Bu müqavilə Samsung üçün də strateji əhəmiyyət daşıyır. Belə ki, razılaşma şirkətin yaddaş çipləri seqmentindən kənarda yarımkeçirici biznesində mövqelərini gücləndirə bilər.

Mütəxəssislər hesab edirlər ki, süni intellekt çipləri bazarının sürətlə böyüməsi fonunda Samsung kimi güclü alternativ istehsalçıların önə çıxması sektorda rəqabəti artıraraq bazardakı qüvvələr balansına təsir göstərə bilər.