ABŞ Prezidenti Donald Trampın administrasiyası İranın nüvə obyektlərinə qarşı planlaşdırılan hərbi əməliyyatı həyata keçirməmək qərarına gəlib.

GDP Media xəbər verir ki, bunun əvəzinə yaxın vaxtlarda ABŞ və İran arasında mümkün razılaşmanın imzalanacağı tarix və məkanın açıqlanacağı gözlənilir.

Məlumata görə, qərar Vaşinqtonun İran siyasətində hərbi eskalasiyadan diplomatik həll yoluna keçid kimi qiymətləndirilir. Analitiklər hesab edirlər ki, belə siqnallar adətən qlobal maliyyə bazarları tərəfindən müsbət qarşılanır.

Ekspertlərin fikrincə, Yaxın Şərqdə geosiyasi gərginliyin azalması neft qiymətlərində risk mükafatını aşağı sala, inflyasiya gözləntilərini zəiflədə və riskli aktivlərə marağı artıra bilər.

Bununla belə, müşahidəçilər xatırladırlar ki, ABŞ və İran arasında əvvəlki razılaşmaların bir neçəsi müxtəlif səbəblərdən baş tutmayıb və ya uzunömürlü olmayıb. Əgər yeni saziş imzalanarsa, bu, qlobal iqtisadiyyat üçün mühüm makroiqtisadi hadisəyə çevrilə bilər. Belə bir ssenari enerji daşıyıcılarının qiymətlərinin azalmasına, ABŞ dollarının zəifləməsinə və maliyyə bazarlarında risk iştahının müvəqqəti artmasına səbəb ola bilər.