2026-cı ilin ilk 5 ayı ərzində Bakı Beynəlxalq Dəniz Ticarət Limanında aşırılan quru yükün həcmi 950 203 ton təşkil edib.
“GDP Media” xəbər verir ki, bu göstərici ötən ilin müvafiq dövrü ilə müqayisədə 77 faizlik artım deməkdir.
Liman rəhbərliyindən verilən məlumata görə, aşırılan yüklərin əsas hissəsini Türkmənistandan gətirilərək Azərbaycan üzərindən tranzit daşınan kükürd və karbamid təşkil edir. Həmçinin Qazaxıstandan ixrac olunan mis, sink və digər əlvan metal məhsullarının daşınmasında Bakı Limanının rolu əhəmiyyətli dərəcədə artıb.
Mövcud tendensiya və bazar iştirakçılarının yükdaşıma planları nəzərə alınaraq, növbəti aylarda da quru yük seqmentində artım dinamikasının davam edəcəyi proqnozlaşdırılır. Liman rəsmiləri artımı regional nəqliyyat dəhlizlərinin rolunun güclənməsi və Azərbaycanın tranzit potensialından səmərəli istifadə ilə əlaqələndirirlər.
