Rusiya Prezidentinin köməkçisi Yuri Uşakov bildirib ki, Rusiya və Çin liderləri beynəlxalq münasibətlərdə çoxqütblü dünyanın formalaşmasına dair birgə bəyannamə imzalamağa hazırlaşırlar.

GDP Media xəbər verir ki, sənəddə Moskva və Pekinin qlobal idarəetmədə hegemon yanaşmadan imtina və polisentrik beynəlxalq sistemin qurulmasına dair ortaq mövqeyi əks olunacaq.

Məlumata görə, bəyannamə formal olaraq strateji niyyət sənədi hesab edilsə də, hazırkı geosiyasi şəraitdə bu addım Rusiya və Çinin koordinasiyalı siyasət yürütmək niyyətinin növbəti göstəricisi kimi qiymətləndirilir. Ekspertlər hesab edirlər ki, sənəd iki ölkənin iqtisadi və maliyyə əməkdaşlığının daha da dərinləşəcəyinə işarə edir.

Analitiklərin fikrincə, bu proses qlobal maliyyə sistemində dedollarizasiya meyllərini gücləndirə, beynəlxalq ehtiyatlarda Çin yuanının payının artmasını sürətləndirə və alternativ maliyyə-hesablaşma kanallarının inkişafını təşviq edə bilər. Bununla yanaşı, sənədin qısamüddətli dövrdə qlobal likvidlik bazarlarına birbaşa təsirinin məhdud olacağı qeyd edilir.