AzInTelecom-un İdarə Heyətinin sədri Elxan Əzizov bildirib ki, Azərbaycan Dəmir Yolları (ADY) ilə birlikdə ölkənin ictimai nəqliyyat sektorunda ilk dəfə olaraq SİMA Pay ilə ödəniş sisteminin rəsmi istifadəyə verilməsi təmin edilib.

GDP Media xəbər verir ki, bu gündən etibarən sərnişinlər heç bir fiziki karta və ya cihaza ehtiyac duymadan, sadəcə üzünü kameraya tanıtmaqla turniketlərdən sürətli şəkildə keçə biləcəklər. Yeni sistem biometrik identifikasiya əsasında çalışır və sərnişindaşımada rahatlığı maksimum dərəcədə artırır.

Elxan Əzizov layihənin ərsəyə gəlməsində əməyi olan AzInTelecom və ADY komandalarına dərin təşəkkürünü bildirib. O vurğulayıb ki, rəqəmsallaşmanın yaratdığı rahatlığı hər bir vətəndaşın gündəlik həyat tərzinə çevirmək şirkətin başlıca hədəflərindəndir.

Müəllif: Aynur Qəniyeva